Aum DUN deka berengkah 11 nyentuk 22 Mei

KUCHING: Aum Kunsil Nengeri (DUN) ti deka datai tu ila ke deka berengkah 11 nyentuk 22 Mei tu ila, lalu aum tu deka beratika lapan iti perambu sereta seiti perambu tambah ti deka dipenyadika Tuai Pemegai Menua (TYT) Tun Pehin Sri Abdul Taib Mahmud.

Atur aum DUN deka digaga pengelama lapan hari iya nya berengkah ari 11 enggau 12 haribulan lalu ditangkan 15 nyentuk 19 haribulan sereta hari kepenudi iya nya 22 Mei. Baum tu semina digaga maya hari bekereja aja (enda nyengkaum Hari Enam enggau Hari Minggu).

Ku Speaker DUN Datuk Amar Asfia Awang Nassar, pengudah TYT mungkal aum, atur aum nya dipunka enggau 12 pekara dalam ‘Tanya enggau Saut’ sereta ditangkan enggau siti perambu ke deka dibacha (bacha keterubah) Menteri Wang Kedua, Dato Sri Wong Soon Koh kena 12 Mei lalu bacha ti kedua enggau ketiga iya nya kena 16 Mei tu ila.

Ba Perambu ku iya, DUN bisi nerima 9 Perambu (siti enda nyadi) lalu Perambu ti keterubah iya nya bekait enggau ‘Citizen Initiated Referendem’ (CIR) ti deka dipansutka Kaban Kunsil Nengeri (ADUN) Batu Lintang See Chee How, ke minta Perintah Menua tu ngelala ‘Direct Democracy’ nunda Model Switzerland, ku iya.

“Ba Perambu ke enda nyadi iya nya bekait enggau Jaku English, alai jaku ke dikena dalam Aum DUN, ngena Jaku English, ke enda nyadi dibantai ADUN Padungan, Wong Kind Wei, lalu siti Perambu enda diterima laban ngelanggar Atur Aum DUN.

“Aum DUN ke sekali tu, bisi nyelai mimit laban bisi ubah ba pekara bekait enggau Sapit Kepala Menteri ke-3 Datuk Amar Awang Tengah Ali Hasan, dua iku menteri penuh enggau dua iku Menteri Muda.

“Nya alai ba sentang nyimpul jurai jaku ari Kaban Kunsil Nengeri tauka Menteri pan deka berubah (enti suba seiku menteri deka nyimpul tiga jurai jaku ke mangku mayuh portfolio) alai ke sekali tu, atur nya ditusun enggau manah, menteri portfolio nya empu ke deka nyimpul jurai jaku, nitihka Protokol,” ku iya.

Asfia madah munyi nya lebuh betuaika aum media bekait enggau Mantar Kunsil Nengeri (DUN) pengudah abis Aum Mantar DUN di Indu Opis Parti Pesaka Bumiputera Bersatu (PBB) ditu, kilah ensana.

Ku iya nandu, pemayuh tanya ke diterima ari raban ADUN bisi dalam 411 iti tanya, lalu ari penyampau nya, 336 tanya nya minta disaut (ari 49 iku ADUN), 70 iti minta tanya nya disaut ngena chara betulis lalu siti tanya enda diterima.

Ba sentang tanya ti minta saut nengah jaku (oral), pechah nya nyengkaum ari Opis Kepala Menteri ke bisi 83 iti tanya, Opis Menteri Perengka Guna Mensia Mayuh (50), Opis Menteri Pengawa Betanam Betupi Moden enggau Ekonomi Menua Pesisir (43), Opis Menteri Pemansang Infrastruktur enggau pengangkut (34), Opis Menteri Kandang Menua (32), Opis Menteri Pengatur Pengeraja Asal enggau Rampa Menua (20), Opis Menteri Pengawa Berumah enggau Urbanisasi (19), Opis Menteri Pemansang Industri, Dagang enggau Pukuk tauka MIETI (15), Opis Menteri Nembiak, Lumba enggau Main sereta Solidariti (12), Opis Menteri Pengelantang Pendiau, Orang Indu enggau Komuniti (12), Opis Menteri Pengawa Dagang Temuai, Seni enggau Adat Pesaka (11) enggau Opis Menteri Wang (4).

Lalu ba sentang tanya ari ADUN ke minta dibalas nengah chara betulis ke dianjung 11 ADUN, 74 tanya dituju ngagai sekeda opis menteri iya nya Opis Kepala Menteri bisi 12 iti tanya, Opis Menteri Kandang Menua (15), Opis Menteri Perengka Guna Mensia Mayuh (7), ), Opis Menteri Pengatur Pengeraja Asal enggau Rampa Menua (7), Opis Menteri Pemansang Infrastruktur enggau Pengangkut (6), MIETI (5), Opis Menteri Wang (2), Opis Menteri Pengelantang Pendiau, Orang Indu enggau Komuniti (2), Opis Menteri Pengawa berumah enggau Urbanisasi (2), Opis Menteri Pengawa Dagang Temuai (2), Opis Menteri Betanam Betupi Moden enggau Ekonomi Menua Pesisir (2) enggau Opis Menteri Nembiak, Lumba enggau Main enggau Solidariti (1).

Sama bisi enggau ngulu aum media nya, Sapit Speaker DUN Datuk Gerawat Gala, Sekretari DUN Senawi Mohamad enggau Sapit Sekretari DUN Sharifah Sakziah.-UtusanBorneoOnline

Tweet

Subscribe to receive free email updates: