KUCHING: Barisan Nasional (BN) Sarawak deka mantaika orang baru ba Pengawa Bepilih Besai (PRU) Ke-14.
Kepala Menteri ti mega Chairman BN Negeri Datuk Amar Abang Johari Tun Openg madah, entara ke udah ditentuka iya nya nyilih Kaban Parlimen Puncak Borneo Datuk Seri James Dawos Mamit, ti udah ngenukuka diri enda minta pilih ba PRU ke deka datai tu.
“Endang bisi (orang baru) Datuk Dawos, ke udah ngenukuka diri enda bediri minta pilih, reti nya orang baru ba sitak nya.
“Iya (Dawos) enda bediri minta pilih ketegal pengerai...lalu ke bukai kitai nganti aja enti semak maya pengawa bepilih besai ila (dibantaika),” ku iya ba aum pengarang berita pengudah bejadi opis baru Palan Servis DUN Satok ditu, malam ensanus.
Sarawak bisi 31 sitak Parlimen lalu BN udah menang 25 sitak ari penyampau nya maya PRU Ke-13 ke diatur ba taun 2013.
Kelimpah Dawos, entara sitak bukai ti dipelaba diarika orang baru iya nya Parlimen Betong pengudah kaban parlimen nya Datuk Amar Douglas Uggah Embas ke udah minta pilih ba sitak DUN Bukit Saban ba Pengawa Bepilih Nengeri taun nyin kemari, ti dipilih nyadi Sapit Kepala Menteri.
Ngenang silik pasal penyikap betapi enggau PRU, Abang Johari ti mega Presiden Parti Pesaka Bumiputera Bersatu (PBB) madah, taja pan iya enda nemu hari bulan PRU diatur tang raban pengawa bepilih PBB seruran sedia napi pengawa bepilih.
Ku iya, ukai semina PPB tang BN Sarawak mega udah sedia napi PRU ti deka diatur sebarang maya.
“Kitai melabaka nengah polisi perintah enggau nengeri kelebih agi dipelabaka pengarap rayat ngagai BN deka nambah.
“Utai ke pemadu beguna iya nya penegap politik enggau polisi ke disediaka ti beratka rayat sereta pemansang timpuh panjai,” ku iya seraya enda setuju enggau tuduh sekeda piak ti madahka polisi ke dibantaika nya semina ‘hot air’ (semina jaku aja).
Di Sarawak ku iya ti mega Menteri Pengawa Berumah enggau Kandang Mengeri, mayuh polisi udah dibantaika nyerumba 100 hari iya nyadi kepala menteri ti deka dipejalaika dalam timpuh panjai, ambis nadai dalam timpuh tiga taun.
“Awakka aja orang madahka “hot air”(semina jaku aja)...nya bepanggai ba sida tang ti pemadu beguna, polisi ti dibantaika aku nya dikena dalam timpuh panjai ungkup rayat,” ku iya seraya madahka dikena nentuka Sarawak terus maju, perintah patut bejalaika polisi dke bebida dikena nangkup peminta guna jemah ila.
Kelimpah ari nya bekaul enggau dua anak Sarawak ti udah ngangkatka nama nengeri pengudah teulihka midul Emas ba Pekit Matematik Dunya Ke-14, Abang Johari madahka perintah deka berunding meri perais ari sukut skolarsip ti beratika pemujur jemah ila.
“Naka ke diatu bedau bisi (insentif) laban kitai deka meda dulu naka ni tikas pemujur sida ke alai sida patut diberi skolarsip...nyema sida pas SP enggau ke bukai kitai ulih nyendiaka pelanja skolarsip.
“kitai nemu matematik iya nya subjek ti amat beguna dalam dunya siber lalu kitai deka mekuh ngagai dua subjek ke bukai iya nya sains enggau teknologi kelimpah ari injiniring,” ku iya.
Abang Johari madahka Sarawak deka mekuhka polisi pelajar STEM (Sains, Teknologi, Injiniring enggau Matematik) dikena nempa anak Sarawak ti bepenemu seraya numbuhka pengawa ke sida, nyengkaum ngemeratka ekonomi digital.-UtusanBorneoOnline
