KUCHING: Datuk Amar Abang Johari Tun Openg ke dipilih nyadi Kepala Menteri Ke-6 senipak enggau peneleba iya ke chukup mayuh dalam politik enggau nusun sereta ngatur pengawa ungkup nengeri Sarawak.
Tuai Megai Menua (TYT) Sarawak, Tun Pehin Sri Abdul Taib Mahmud madahka diri arap bendar Sarawak ulih nyapai mayuh agi pemansang berindik ari kaul perintah nengeri nengah Abang Johari enggau Perintah Besai ti chukup manah.
Iya madahka pengawa besilih orang ke megai kuasa ngiring nengeri tu ke udah diatur enggau lanchar ngayanka penuai enggau penegap politik di Sarawak.
“Pengawa milih Yang Amat Berhormat Datuk Amar Abang Johari Tun Openg nyadi Kepala Menteri Ke-6, ngayanka penuai iring politik Nengeri Sarawak dikena ngenukuka penegap politik ti di nengeri tu ulih dipajakka.
“Pengawa milih iya (nyadi Kepala Menteri) senipak bendar enggau peneleba iya ti chukup mayuh dalam politik enggau nusun sereta ngatur pengawa ungkup nengeri Sarawak,” ku iya.
Tun Taib mansutka pekara nya lebuh ke bejaku nyerumba pengerami muka Aum Keterubah Penggal Kedua Kunsil Nengeri Sarawak Ke-18 ke diatur ba Kompleks Kunsil Nengeri ditu, kemari.
Perintah nengeri enggau Perintah Besai ngembuan kaul ti chukup manah ku iya seraya madahka diri gaga ati laban Kepala Menteri mega bisi kaul ke manah enggau ketuai renggat Perintah Besai.
Kaul ti manah nya ku iya deka ngemudahka perintah nengeri bekerejasama sereta nerima sukung rat ari Perintah Besai ba pengawa merambu enggau bejalaika agenda pemansang nengeri.
“Aku arap bendar kaul ti manah tu deka meri mayuh agi awak enggau peluang ngagai iya ngemajakka pengawa negi hak enggau pemesai reti Sarawak ba renggat Perintah Besai.
“Aku pechaya ari baruh iring iya (Abang Johari), Sarawak jemah ila deka terus ngerembai sereta maju,” ku iya ti disempulang bini iya, Toh Puan Datuk Patinggi Raghad Kurdi Taib.
Kelimpah ari nya, Tun Taib madahka diri nyambut manah inisiatif baru ke dipejalaika perintah nengeri nengah iring Abang Johari bekaul enggau pemansang ekonomi.
Iya madahka nya chara ke engekeman ngambika nengeri tu terus besemekih ba renggat antarabansa.
“Dalam kitai betapi enggau penyengang pengerembai teknologi, pemutus perintah nengeri ti deka bejalaika pemansang ekonomi digital diatu endang senutuk amat.
“Ba pengawa kitai ke deka terus besemekih ba renggat antarabansa, kitai patut ngemaruka ekonomi nengeri nengah chara nyungkak puku nyengkaum dalam ekonomi digital,” ku iya ngarapka rayat nengeri tu ulih disikap sereta ngerebut peluang dalam ekonomi digital enggau ke bukai.
Sama bisi ba pengerami nya kemari, Abang Johari enggau bini iya, Datin Amar Datuk Juma’ani Tuanku Bujang; tiga iku Sapit Kepala Menteri, Datuk Amar Douglas Uggah Embas, Tan Sri Datuk Amar James Jemut Masing enggau Datuk Amar Awang Tengah Ali Hasan; Speaker Kunsil Nengeri Datuk Amar Mohamad Asfia Awang Nassar sereta bala menteri, menteri muda enggau kaban kunsil nengeri.-Utusan Borneo Online
